વીરપરની સીમમાંથી દારૂની ભઠ્ઠી પકડાઈ

પંચાસરના શખ્સનું નામ સામે આવ્યું

સજનપર નજીક જુગારની રેડમાં 3 શખ્સની ધરપકડ

વાંકાનેર: તાલુકાના વીરપર ગામની સીમમાં ખરાબાની જગ્યામાંથી દારૂની રેડ કરવામાં આવી ત્યારે ત્યાં સ્થળ ઉપરથી દેશી દારૂ બનાવવા માટે ઉપયોગમાં લેવામાં આવતો 1600 લીટર આથો તથા 60 લિટર તૈયાર દેશી દારૂ મળી આવતા પોલીસે 52,000 ની કિંમતનો મુદ્દામાલ કબજે કર્યો હતો

વાંકાનેર તાલુકા પોલીસની ટીમ પેટ્રોલિંગમાં હતી ત્યારે વીરપર ગામની સીમમાં અરમાનો સિરામિક પાછળ વડીયા વિસ્તારમાં દારૂની ભઠ્ઠી ચાલુ હોવા અંગેની હકીકત મળી હતી તેના આધારે પોલીસે ત્યાં રેડ કરી ત્યારે સ્થળ ઉપરથી દેશી દારૂ બનાવવા માટે ઉપયોગમાં લેવામાં આવતો 1600 લિટર આથો તથા 60 લિટર તૈયાર દેશી દારૂ મળી આવતા પોલીસે 52 હજાર રૂપિયાની કિંમતનો મુદ્દામાલ કબજે કર્યો હતો.

અને સ્થળ ઉપરથી લાભુ અમરશીભાઈ જોલાપરા (59) રહે. હાલ નવાપરા વાંકાનેર મૂળ રહે. જાંબુડીયા તાલુકો મોરબી વાળાની ધરપકડ કરી હતી અને તેની પાસેથી કિશન ભરતભાઈ ધામેચા રહે. પંચાસર તાલુકો વાંકાનેર વાળાનું નામ સામે આવ્યું હોય બંને સામે ગુનો નોંધી બીજા આરોપીને પકડવા માટે તજવીજ ચાલી રહી છે.

સજનપર નજીક જુગારની રેડમાં 3 શખ્સની ધરપકડ
ટંકારાના સજનપરથી ઘુનડા ગામ તરફ જવાના રસ્તા ઉપર તળાવના કાચા માર્ગે બાવળની જાળીમાં જુગારની રેડ કરવામાં આવતા જુગાર રમતા શખસોમાં નાશ ભાગ મચી ગઈ હતી અને બે શખ્સ તકનો લાભ લઈને નાસી ગયા હતા ત્રણ શખ્સની પોલીસે 1,59,800 ની રોકડ સાથે ધરપકડ કરેલ છે.

ટંકારા તાલુકા પોલીસની ટીમ પેટ્રોલિંગમાં હતી ત્યારે સજનપર ગામથી ઘુનડા ગામ તરફ જવાના રસ્તા ઉપર આવેલ તળાવના કાચા માર્ગે બાવળની જાળીમાં સ્થાનિક પોલીસ દ્વારા રેડ કરવામાં આવી ત્યારે સ્થળ ઉપરથી મનોજભાઈ ચુનીલાલ ઠાકર (35) રહે. રામજી મંદિર પાસે રવાપર, વિશાલ દેવદાનભાઈ ડાંગર (29) રહે. હનુમાનજી મંદિરની બાજુમાં રવાપર તથા ભાવેશ ભગવાનજીભાઈ મેરજા (39) રહે. પંચાસર રોડ રાજનગર મોરબી વાળા મળી આવ્યા હતા.

જેની પાસેથી પોલીસે 1,59,800 રૂપિયાની રોકડ કબજે કરી હતી અને પોલીસ દ્વારા રેડ કરવામાં આવી હતી ત્યારે સ્થળ ઉપરથી તકનો લાભ લઈને માધવ ભાલોડીયા રહે. સજનપર તથા હિરેન ચાડમીયા રહે. રવાપર નાસી ગયેલ છે જેથી હાલમાં પાંચ શખ્સોની સામે ટંકારા તાલુકા પોલીસ સ્ટેશન ખાતે જુગારનો ગુનો નોંધી પોલીસે નાસી છૂટેલ બે આરોપીને પકડવા માટે તજવીજ શરૂ કરી છે.