જિલ્લા મહિલા અને બાળ અધિકારીની કચેરી દ્વારા ચૂંટાયેલા પ્રતિનિધિઓને કન્યા શિક્ષણ અને કલ્યાણકારી યોજનાઓ અંગે માર્ગદર્શન અપાયું
વાંકાનેર: જિલ્લા મહિલા અને બાળ અધિકારીની કચેરી દ્વારા “બેટી બચાઓ, બેટી પઢાઓ” યોજના અંતર્ગત વાંકાનેર તાલુકા પંચાયત કચેરી ખાતે પંચાયતના ચૂંટાયેલા પ્રતિનિધિઓ તથા અધિકારીઓ સાથે જાગૃતિ કાર્યક્રમનું આયોજન કરવામાં આવ્યું હતું.
આ કાર્યક્રમ દરમિયાન ગ્રામ્ય સ્તરે દીકરીઓના જન્મદરને પ્રોત્સાહન આપવા, દીકરીઓના જન્મને ઉત્સવ તરીકે ઉજવવા તેમજ ‘વ્હાલી દીકરી’ જેવી કલ્યાણકારી યોજનાઓ છેવાડાના માનવી સુધી પહોંચાડવા અપીલ કરાઈ હતી. આ ઉપરાંત બાળ લગ્ન અટકાવવા, કન્યા શિક્ષણને 100 ટકા સફળ બનાવવા અને ‘બાલિકા પંચાયત’ના નવતર અભિગમ અંગે વિસ્તૃત માર્ગદર્શન પૂરું પાડી પંચાયતના પ્રતિનિધિઓને સક્રિય યોગદાન આપવા જણાવાયું હતું.
આ પ્રસંગે તાલુકા પંચાયત સદસ્યો, TDO, સરપંચો તથા તલાટી-કમ-મંત્રીઓ ઉપસ્થિત રહ્યા હતા.
